Чаллы шәһәренең бер предприятиесе табигатьне саклау законнарын бозган өчен 320 мең сум штрафка тартыла
Татарстан Республикасы Экология һәм табигать ресурслары министрлыгының Кама буе территориаль идарәсе хезмәткәрләре планлы тикшерү барышында Чаллы предприятиесендә берничә хокук бозу фактын ачыклый. Шәһәр төзелеше эшчәнлеген гамәлгә ашырганда һәм предприятиеләрне эксплуатацияләгәндә, экология таләпләре үтәлми, төгәлрәк әйткәндә, атмосфера һавасына калдыклар чыгару чыганакларына инвентаризация үткәрелми. Предприятие I-IV класслы куркынычлыкка ия калдыкларга паспорт төземи, шуңа күрә җитештерү калдыклары белән эш итүнең экология һәм санитария-эпидемиология таләпләрен бозып, әйләнә-тирәлеккә тискәре йогынты ясаган өчен түләүләр кертмәгән. Моннан тыш, әйләнә-тирә мохиткә тискәре йогынты ясый торган объектларны дәүләт исәбенә кую өчен гариза бирелмәгән яки үз вакытында башкарылмаган. Ягъни әйләнә-тирә мохиткә тискәре йогынты ясаган юридик зат исәптә тормый һәм аңа куркынычлык классы бирелмәгән булуы ачыклана. Бу «Әйләнә-тирә мохитне саклау турында»гы Федераль законның 69.2 статьясын бозу дип санала. Гаепле затка карата, «Экология күзәтчелеге» программа комплексын кулланып, Административ хокук бозулар турында РФ кодексының берничә статьясы буенча административ хокук бозу турында беркетмәләр төзелә. Шулай ук административ хокук бозуга китергән сәбәпләр һәм шартларны юкка чыгару турында күрсәтмә бетерелә һәм 320 меңлек штраф рәвешендә административ җәза билгеләү турында карар чыгарыла.