22 сентябрь – халыкара Автомобильсез көн

22 сентябрьдә бөтен дөньяда Автомобильсез көн үткәрелә, аның девизы: “Шәһәр – кешеләр тирәлеге, яшәү тирәлеге”. Татарстан Экология һәм табигый байлыклар министрлыгы республиканың барлык автомобильчеләрен шәхси транспорт чарасыннан бер көнгә баш тартырга чакыра. Акция автомобильләрнең әйләнә-тирәлеккә тискәре йогынтысын искә төшерү, халыкны альтернатив хәрәкәт чараларыннан: җәмәгать транспортыннан, велосипедтан һәм башка шундыйлардан файдалануга өндәү максатыннан үткәрелә.
Татарстанда, 2009 елдан башлап, акциядә ел саен 60 меңнән артык автомобиль иясе катнаша. Һәр автомобильнең тәүлек саен атмосфера һавасына 5-6 кг пычраткыч матдә чыгаруын исәпкә алсак, акция үткәрелгән көнне мондый пычрату 300 тоннага кадәр кими дигән сүз.
Атмосфера һавасына автотранспортның тискәре йогынтысын киметү чаралары тулаем республика күләмендә күрелә. Татарстан Экология һәм табигый байлыклар министрлыгы, МВДның Татарстан буенча ГИБДД идарәсе белән берлектә, ел саен майдан сентябрьгә кадәр “Саф һава” операциясе – автотранспорт чараларының төтен газларындагы пычраткыч матдәләр нормативына күзәтчелек буенча профилактик чара үткәрә.
Автотранспортның әйләнә-тирәлеккә тискәре йогынтысын киметү максатыннан Татарстанда мотор ягулыгының альтернатив төрләрен, барыннан элек компримацияләнгән табигый газ, шулай ук экологик характеристикалары яхшыртылган ягулык куллану буенча актив эш алып барыла. Республиканың автотранспорт предприятиеләре 272 газ автобусы сатып алды. 2013 елда “2013-2023 елларда Татарстан Республикасында газ-мотор ягулыгы базарын үстерү” дәүләти программасы расланды. Аны тормышка ашыру нефтьтән эшләнгән сыек мотор ягулыгын куллануны шактый кыскартырга һәм автотранспортның атмосферага пычраткыч матдәләр чыгаруын 13 мең тоннадан артык киметергә мөмкинлек бирәчәк.
Казанда шәһәрнең аеруча зур йөкләнешле автомагистральләрендә транспорт бүлгечләр төзү буенча зур эш башкарылды, бу исә шәһәр һавасының пычрану кимәле төшүгә китерде.
Әйләнә-тирәлекнең торышына шәһәрләрдә йөк автомобильләре хәрәкәтен чикләү буенча җирле үзидарә органнары күрә торган чаралар да уңай тәэсир итә, шуның белән республикада автомобильләр аркылы пычрану 40%ка диярлек киметелә.
Республикада пычраткыч матдәләрне автоягулык станцияләреннән һәм нефть базаларыннан чыгаруны киметү буенча да зур эш башкарыла. Ул 2 этапка бүленгән. 2015 елга кадәрге 1нче этапта 4 эре шәһәрдә: Казанда, Чаллыда, Түбән Камада һәм Әлмәттә кулланыла торган 251 автоягулык станциясе мотор ягулыгы парларын тоту һәм рекуперацияләү системалары белән җиһазланырга тиеш. 2020 елга кадәрге 2нче этапта республиканың башка торак пунктларында урнашкан 225 станцияне җиһазлау күздә тотыла.
Транспортның әйләнә-тирәлеккә тискәре йогынтысын киметүгә юнәлтелгән чаралар, автотранспортның тулай саны тиз артуга карамастан, атмосфера һавасы пычрану кимәлен төшерүне тәэмин итәләр.
Министрлыкның матбугат хезмәте