Җиде ел эчендә Татарстанда табигатьне саклау чараларына 72 млрд.сумга якын акча юнәлдерелгән
Соңгы җиде елда Татарстанның табигатьне саклау чараларына инвестицияләрнең гомуми күләме 71,8 млрд.сум тәшкил итте. Бу хакта бүген ТР экология һәм табигать ресурслары министры Александр Шадриков Казанда А.И.Щеповских исемендәге XX Бөтенроссия фәнни-гамәли конференциясенең пленар утырышында хәбәр итте.
«2019 елдан без «Экология» илкүләм проектын гамәлгә ашыру өстендә актив эшләдек. Татарстан территориясендә алты федераль проект кысаларында 21,6 млрд.сумлык 30 чара гамәлгә ашырылды, шул исәптән федераль бюджеттан – 17,2 млрд.сум һәм республика бюджетыннан – 4,4 млрд.сум. Төбәк предприятиеләре 41 млрд.сумнан артык акча кертте – бизнесның югары социаль һәм экологик җаваплылыгы үрнәге», – дип сөйләде ул.
Александр Шадриков Татарстанда «Экология» илкүләм проекты һәм Россия Табигать министрлыгы ярдәмендә тормышка ашырылган зур чараларны атады. Алар арасында – «Иделне савыктыру» федераль проекты буенча чаралар. Төбәктә 13 чистарту корылмасы төзелгән һәм реконструкцияләнгән, алар арасында Казанның иң эре биологик чистарту корылмалары да бар.
«Быел без БЧК реконструкцияләү комплексында барган ләм кырларын рекультивацияләүне төгәллибез. Бу проект – фәнни эшләнмәләрнең интеграциясе үрнәге – Министрлыкның экология, инженерлык һәм идарәи карарлар фәнни советы. ТР Фәннәр Академиясенең катнашуы, фәнни-техник советта ачык фикер алышу аша иң яхшы технологияләрне сайлау һәм җәмгыятькә киң мәгълүмат бирү – эшләрнең сыйфаты һәм социаль ышаныч гаранты», – диде Шадриков.
«Чиста ил» федераль проекты буенча тискәре йогынтының биш объекты рекультивацияләнгән, шул исәптән өч эре чүплек. Бу Түбән Кама районының Прости авылындагы чүплек, Минзәләдәге чүплек һәм Казандагы Самосырово полигоны.