БРИКСта катнашучы илләр зур мәчеләрнең сирәк төрләрен саклау буенча көчләрен берләштерәчәк
Халыкара зур мәчеләр альянсын булдыру тәкъдиме белән Һиндстан Республикасы 2023 елда Йоханнесбургта БРИКС лидерлары саммиты барышында чыгыш ясады. Мәчеләрнең аеруча зәгыйфь төрләрен саклап калуга һәм яклауга киләчәктә ярдәм итү максатларында уртак эшкә чакыруны илләр лидерлары Казандагы XVI берләшмә саммитында хуплады.
Шунысын да билгеләп үтәргә кирәк, Россиядә яшәүче зур мәчеләрнең 4 төре «Экология» илкүләм проектының өстенлекле исемлегенә кертелгән. Документ нигезендә, Ерак көнчыгыш леопарды, Амур юлбарысы, алгы Азия леопарды һәм ак барс торгызу һәм реинтродукция буенча беренче чираттагы чаралар кабул итүне таләп итә.
Татарстан Республикасы биологик төрлелекне саклау эшенә актив кушылды. «Экология» илкүләм проектының «Биологик төрлелекне саклау һәм экологик туризмны үстерү» федераль проекты кысаларында регион инициативасы буенча ак барс төркемен торгызу максатында Алтай Республикасы территориясендә «Ак барс» үзәген төзү проекты гамәлгә ашырыла. Ул сирәк һәм юкка чыгу куркынычы астында булган мәчеләрнең популяцияләрен саклау һәм торгызу өчен фәнни мәгълүмат туплауга ярдәм итәчәк.
Үзәк составына фәнни-тикшеренү өлеше һәм хайваннарны тоту, үрчетү һәм өйрәнү секторының вольер комплексы керә. Биредә юкка чыга торган төрнең чиста геномын саклау өчен генә түгел, киләчәктә аларның популяциясен саклау һәм торгызу өчен күп дәрәҗәле бурычларны хәл итәргә мөмкин.
«Ак барс» үзәген төзү һәм аның фәнни өлеше белән бергә Россия Фәннәр академиясенең А.Н. Северцов исемендәге Экология һәм эволюция проблемалары институты да бара. Хәзерге вакытта галимнәр тарафыннан фәнни-тикшеренү эшчәнлеге программасы эшләнде, аның максаты - сирәк һәм юкка чыгу куркынычы яный торган хайваннар төрләрен тоту һәм яңарту ысулларын камилләштерү һәм гамәлгә кертү, шулай ук Үзәкнең фәнни эшенең төп юнәлешләре эшләнгән.