Ольга Манидичева “Хезмәт иясе яшьләр һәм иҗтимагый инициативалар” форумында “Экологик иминлек” илкүләм проектын гамәлгә ашыру турында сөйләде
Казанда “Хезмәт иясе яшьләр һәм иҗтимагый инициативалар” профсоюз активының III Республика форумы узды. Рәсәйдә Яшьләр көненә багышланган чарада 500гә якын кеше катнашты. Оештыручылар - Татарстан Республикасында “Бердәм Рәсәй”гә иҗтимагый ярдәм Штабы һәм Татарстан Республикасы профсоюзлар Федерациясе.
“Җитештерүдә экологик инициативалар” секциясе кысаларында доклад белән экология министры урынбасары Ольга Манидичева чыгыш ясады. Ул катнашучыларга республикада “Экологик иминлек” милли проектының ничек гамәлгә ашырылуы турында сөйләде һәм масштаблы табигатьне саклау эшенә арадаш йомгаклар ясады.
Спикер билгеләп үткәнчә, Татарстанның барлык экологик проектлары нигезендә үз нәтиҗәлелеген исбатлаган системалы алым ята. 8 ел эчендә, 2018 елдан 2025 елга кадәр, республикада 107 миллиард сумга якын 1300дән артык табигатьне саклау чарасы гамәлгә ашырылды. Әлеге акчаларның зур өлеше - Татарстан предприятиеләре инвестицияләре. Әлеге эш нәтиҗәсендә 117 миллиард сумлык экологик зыянны булдырмый калу һәм 3,5 миллион кешенең тормыш сыйфатын яхшырту мөмкин булды.
Министр урынбасары ассызыклаганча, табигатьне саклау чараларына Татарстан Республикасы Рәисе Рөстәм Нургали улы Миңнеханов зур ярдәм күрсәтә. Аның кушуы буенча республика программалары гамәлгә ашырыла, алар кысаларында гидротехник корылмалар төзелә яисә капиталь ремонтлана, елгалар һәм күлләр чистартыла.
Шулай ук ул Татарстанда “Экологик иминлек” илкүләм проектына ярдәм йөзеннән 2023 елдан алып барыла торган Кызыл китапка кертелгән лачын-балобан популяциясен торгызу эше турында сөйләде.
Министр урынбасары билгеләп үткәнчә, теләсә нинди тырышлык халык катнашыннан башка тулы булмас иде. Бүген республика халкының 35% тан артыгы - миллион ярымга якын кеше экологик агарту программаларына җәлеп ителгән.