Татарстан Рәисеннән сәламләү сүзе белән «Россия суы» бөтенроссия съездында катнашучылар алдында ТР экология министры Азат Җиһаншин чыгыш ясады
Чара быел нигез салынуга 400 ел тулуны билгеләп үтүче Яр Чаллыда уза.
Министр укыган мөрәҗәгатьтә Татарстанның хаклы рәвештә илнең төп су регионнарының берсе булып саналуы ассызыклана. Нәкъ менә монда ике бөек елга — Идел һәм Кама кушыла, алар Россия Су системасының шактый зур өлешен формалаштыра. Моннан тыш, республика территориясендә Евразиядә иң зурларның берсе булган Куйбышев сусаклагычы урнашкан. Барлыгы төбәктә 36 меңнән артык су объекты исәпләнә, һәм бу уникаль мирасны саклау киләчәк буыннар алдында уртак җаваплылык булып тора.
Сәламләү сүзендә бүген миллионлаган битараф булмаган кешеләрне берләштерүче экологик хәрәкәткә аерым игътибар бирелде. Татарстанда бу эш чын мәгънәсендә гомумхалык характерына ия булды: аңа иҗтимагый оешмалар, сәнәгать предприятиеләре, хакимият органнары һәм төрле яшьтәге волонтерлар җәлеп ителгән. Халыкның актив позициясе нәтиҗәсендә республика инде берничә ел рәттән «Россия суы»бөтенроссия акциясе лидеры була.
Съездны нәкъ менә куәтле сәнәгать потенциалы урнашкан һәм Югары экологик стандартлар кертелгән Яр Чаллыда уздыру вакыйгага аерым әһәмият бирә. Азат Җиһаншин Татарстан Рәисе исеменнән форумда катнашучыларга конструктив багланышлар, яңа идеяләр теләде һәм әйләнә-тирә мохиткә битараф булмаган һәм җаваплы мөнәсәбәтләре өчен рәхмәт белдерде.
"Татарстанга рәхим итегез!"- съезд кунакларына һәм делегатларына сәламләү мөрәҗәгате шундый сүзләр белән тәмамланды.