“Зәңгәр күлләр” тыюлыгында Казансу ярын ныгыту

Хәзерге вакытта, 2012 елда табигатьне саклау чараларының республика программасы кысаларында, дәүләт заказчысы булган “Главинвестстрой РТ” идарәсе тарафыннан, “Реставрация” ЯАҖ төзелеш оешмасын җәлеп итеп, “Зәңгәр күлләр” дәүләти табигать комплексы тыюлыгы территориясендә Казансу ярын ныгыту” проекты тормышка ашырыла. Эш башкару участогы Казан ш. Авиатөзүчеләр районында урнашкан. Эшләрне тәмамлау срогы – 2013 елның январе.

Бу эшләргә Казансу елгасының уң яры ел саен 0.5–0.6 метрга җимерелү мәҗбүр итә, шул сәбәпле яр бөтенләй җимерелеп, Зәңгәр күлдә су кимәле нык кимергә мөмкин.

2011 елда участокны Татарстан Урман хуҗалыгы вәкилләре катнашындагы комиссия белән тикшерү вакытында ермакны чүп-чардан һәм ауган агачлардан чистарту, ярны ныгыту кирәклеге ачыкланган иде.

Комиссия тәкъдимнәрен исәпкә алып “Спецгидрострой” ЯАҖ тарафыннан әзерләнгән проект документлары билгеләнгән тәртиптә Татарстан Урман хуҗалыгы белән килештерелде, дәүләт экспертизасы һәм дәүләт экологик экспертизасы тарафыннан уңай бәяләнде.

Гамәлдәге законнарга ярашлы рәвештә җәмәгатьчелеккә белешмә бирү, халыкка тыңлатулар үткәрү, материалларны дәүләт экологик экспертизасына җибәрү турындагы белешмәләрне бастырып чыгару буенча билгеләнгән таләпләр үтәлде.

Дәүләт экологик экспертизасы үткәрү нәтиҗәләре буенча ярны карагай субайлар кагып ясалган вертикаль стена арасына таш тутыру юлы белән ныгыту варианты хупланылды. Табигый материаллар – карагай, ком, кырчынташ куллану табигый ландшафтны сакларга мөмкинлек бирәчәк.

Ярны терәк стена корып ныгыту һәм төзекләндерү эшләре башкару нәтиҗәсендә яр җимерелү, туфрак юылу һәм эрозия процесслары тукталачак, уникаль табигать объекты булган Зәңгәр күл саклап калыначак.

Һава торышының һәм геологик шартларның катлаулы булуы аркасында, ермакны чүп-чардан һәм ауган агачлардан чистартканда эшләп торган техника урнашкан грунт шуышып ишелгән иде. Хәзерге вакытта техника чыгарылган, чистарту һәм ярны ныгыту эшләре яңартылган. Эш барышы даими контрольгә алынган.

Бер үк вакытта шуны хәбәр итәбез, – яр ныгыту эшләре барган урынга якын территориядә элегрәк яшь агачлар киселгән булу факты ачыкланды, Татарстан Экология һәм табигый байлыклар министрлыгы инспекторлары шуның буенча административ тикшерү кузгаттылар.