Апас районында зур чүплек бетерелде
Элегрәк Идел аръягы идарәсе инспекторлары Чура-Барыш авыл җирлеге территориясендә табигатьне саклау законнарын бозуны теркәгәннәр иде.
Танай-Турай авылы янында экологлар җитештерү һәм куллану калдыкларын рөхсәтсез җыюны ачыкладылар.
Чүплекнең гомуми мәйданы 4 621 кв. м, күләме - 3 720 куб. м.
Апас районының Чура-Барыш авыл җирлеге башкарма комитетына экологлар табигатьне саклау законнарының мәҗбүри таләпләрен бозуга юл куймау турында кисәтү юлладылар.
Кабат чыгып киткәндә инспекторлар чүплекнең бетерелмәгәнлеген ачыклаган.
Шуннан соң эш Апас район судына күчте. Барлык материалларны карау нәтиҗәләре буенча суд экологлар позициясен хуплады һәм Башкарма комитетка хокук бозуны бетерүне йөкләде.
Бүгенге көндә чүплек бетерелгән, территория тиешле санитар-экологик хәлгә китерелгән.