Яшь геологларның IX Бөтенроссия ачык кыр олимпиадасы йомгаклары буенча брифинг

2013 елның 13 августы
Брифингта катнашучылар:
Артем Георгиевич Сидоров – Татарстан Республикасы экология һәм табигать ресурслары министры
Равил Хәйдәрович Мотыйгуллин – Татарстан Республикасы буенча Җир асты байлыкларыннан файдалану идарәсе башлыгы
Марат Фаикович Мәһдиев – “Татнефть” ААҖ Татарстан геологик эзләнүләр идарәсенең экология һәм гидрогеология буенча башлыгы урынбасары, “Россия Геологик Җәмгыяте” иҗтимагый оешмасының Татарстан региональ бүлекчәсе рәисе

1 – 10 август көннәрендә Казанда киң күләмле чара – Яшь геологларның IX Бөтенроссия ачык кыр олимпиадасы булып узды. Ул ике елга бер тапкыр Россия Федерациясенең төрле субъектларында үткәрелә. 2013 елда, Җир асты байлыкларыннан файдалану федераль агентлыгы җитәкчесе Александр Попов һәм Татарстан Республикасы Президенты Рөстәм Миңнеханов боерыгы буенча, олимпиада Казанда үткәрелде. Быел анда Россия Федерациясенең 31 субъектыннан 40 команда катнашты (Алтай краеннан, Архангельск өлкәсеннән, Амур өлкәсеннән, Башкортстаннан, Бурятиядән, Воронеж, Иркутск, Калининград, Кемерево, Киров өлкәләреннән, Краснодар, Красноярск крайларыннан, Липецк, Магадан өлкәләреннән, Мәскәүдән, Мәскәү, Новосибирск, Омск, Оренбург өлкәләреннән, Пермь, Диңгез буе крайларыннан, Ростов, Самар, Свердлов өлкәләреннән, Татарстаннан, Томск, Тула, Төмән, Чиләбе өлкәләреннән, Чуашстаннан, Ярославль өлкәсеннән); кайбер регионнар икешәр команда җибәрде, Казахстаннан һәм Украинадан да икешәр команда, ә Үзбәкстаннан һәм Таҗикстаннан берәр команда килде.
Яшь геологлар олимпиадасы “Кояшлы” һәм “Аръяк” балалар савыктыру лагерьлары базасында үткәрелде. Олимпиадада катнашучылар шунда урнаштырылды, яшәде һәм тукланды. Беренче чиратта лагерьлар территориясендә куркынычсызлыкка игътибар ителде, тәүлек буе каравыл тотылды. Олимпиада үткәрелгән бөтен вакытта лагерьлар базасында медиклар эшләде. Геологик ярышлар һәм конкурслар үткәрелгән бөтен территория санитар-эпидемиологик эшкәртелде. Катнашучылар автобусларда йөргәндә аларны ГИБДД инспекторлары озата барды. Шулай ук “Кояшлы” һәм “Аръяк” лагерьларында WI-FI зоналары оештырылды, кирәкле белешмәләрне үзәктән тапшыру өчен цифрлы таблолар урнаштырылды.
Олимпиада үткәрелгән көннәрдә геологик ярышлар, конкурслар һәм мәдәни чаралар оештырылды (шул исәптән “Геологик маршрут”, “Геологик кисем”, “Палеонтология”, “Минералогия һәм петрография”, “Гидрология”, “Радиометрия”, “Шлих сынау”, “Техник куркынычсызлык нигезләре”, “Кыр станы оештыру”, “Геологик хисап”, “Геологик һәйкәлнең тасвиры” һәм башкалар). Мәктәп балаларының палеонтология, петрография, минералогия, кристаллография, геохимия, экогеология, структур геология, тарихи һәм инженерлык географиясе, гидрогеология, файдалы казылмалар геологиясе буенча теоретик һәм практик белемнәре тикшерелде.
Шәхси беренчелектә призлы урыннарны алдылар:
1 урын – Мария Махмутина, “Яшь геологлар партиясе” командасы, Пермь шәһәре
2 урын – Мария Шилова, Мәскәү дәүләт университетының Геология мәктәбе
3 урын – Юлия Пуговкина, Томск шәһәре җыелма командасы
Команда ярышларында беренчелекне алдылар:
1 урын – Пермь краеның җыелма командасы
2 урын – Томск өлкәсенең җыелма командасы
3 урын – “Яшь геологлар партиясе №1”, Пермь шәһәре.
Яшь геологларның X Бөтенроссия ачык кыр олимпиадасы Төмән шәһәрендә 2015 елда үткәреләчәк.
Яшь геологларның ачык кыр олимпиадасы патриотизм, туган якка мәхәббәт, Россиянең табигатенә һәм минераль байлыкларына сак караш тәрбияләү, шулай ук геология буенча квалификацияле кадрлар әзерләү максатыннан үткәрелә.
Геолог һөнәре үзе үк универсаль, геологик эшчәнлек белән бәйле барлык җитештерү тармакларында да кирәкле һөнәр булып тора. Казан университетын тәмамлаган геологларны файдалы казылмалар чыгару һәм геологик эзләнүләр белән шөгыльләнүче Россия һәм чит ил компанияләренә бик теләп чакыралар һәм хөрмәт итәләр.
ТР Экология һәм табигать ресурслары министрлыгының матбугат хезмәте