Экосистемаларны үстерү. Дөнья тәҗрибәсе

15 май 2013 ел., чәршәмбе
Халыкара Табигать саклау берлегенең Экосистемалар белән идарә итү комиссиясе рәисе Пит Уит һәм Эстония Социаль фәннәр университеты профессоры Калев Сепп Казан (Идел буе) федераль университетында булдылар. Кунакларны Татарстан экология һәм табигый байлыклар министры Артем Сидоров озата йөрде. Университет хезмәткәрләре белән очрашу һәм зоологик музейны карау оештырылды. Пит Уит һәм Калев Сепп вузның укытучылары һәм студентлары алдында чыгыш ясадылар.
Чара “Бердәм экологик дәрес” экологик агарту акциясе кысаларында узды. Татарстан экология һәм табигый байлыклар министрының беренче урынбасары Рөстәм Камалов Халыкара Табигать саклау берлеге экспертларының республикага үзләренең 50 илдәге эш тәҗрибәләре белән уртаклашу өчен чакырылган булуларын әйтте. (Аерым алганда – климат үзгәрү өлкәсендәге казанышлары, Европадагы, Татарстандагы эшләре (Зөя мәдәни-тарихи комплексына ЮНЕСКО статусы бирү) турында.) 2015 елда Татарстан, федерациянең иң алдынгы субъекты буларак, биологик төрлелекне саклау буенча Халыкара конгрессны үзендә кабул итәргә әзер, дип белдерде.
Шул халыкара чара темасына Калев Сепп та кагылып узды. Аның сүзләренчә, Казанда дөньякүләм конгресс оештыруны тикшерү – аның Татарстанга килүенең төп максаты булып тора. “Дөньяда борчулы проблемалар бик күп, төп замана трендларының берсе – климат үзгәрү, ә иң проблемалы мәсьәлә – биологик төрлелекнең кимүе. Моннан тыш, океанның пычрануы бик җитди проблема булып тора”, – дип белдерде ул. Килеп туган хәлдән чыгуның бер ихтимал юлы турында исә галим болай диде: “Экологик һәлакәтне булдырмау өчен җитештерү чистарак була барырга тиеш, барлык илләр бу юнәлештә күмәкләшеп эшләргә тиешләр. Безгә фәнни белемнәр кирәк, чөнки яңа үсеш, яңа технологияләр белән бергә еш кына яңа мәсьәләләр дә барлыкка килә.”
Пит Уит, үз чиратында, климат үзгәрү проблемалары белән көрәштә төп рольне экосистемалар белән идарә итү уйный, дип белдерде. “Кешеләр бүген экология проблемаларын бик еш телгә алалар, без исә шактый күп мөмкинлекләр белән уртаклаша алыр идек. Әлбәттә, ул проблемаларга каршы экосистемалар белән идарә итү аркылы көрәшергә мөмкин. Монда сездә нефть чыгарыла, бу зыян китерергә мөмкин, ләкин бездә аерым төр технологияләр кулланганда зыянны булдырмый калу мисаллары бар. Экосистемалар белән идарә итү экологик ялгышларны төзәтергә юл ача”, – диде ул.
Татарстанга эш визиты барышында Халыкара Табигать саклау берлегенең Экосистемалар белән идарә итү комиссиясе рәисе Пит Уит һәм Эстония Социаль фәннәр университеты профессоры Калев Сепп Татарстан Экология һәм табигый байлыклар министрлыгында да булдылар, монда Министр Артем Сидоров белән очрашу булып узды, аның соңында Казан шәһәре буйлап күзәтү экскурсиясе үткәрелде.
К(И)ФУ матбугат хезмәте материалы файдаланылды.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования